Rulebook

LIBRO DE REGRAS

Obxectivo

Gaña o primeiro xogador en "viaxar" ao país do centro.
Pero, antes, cada xogador ten que cruzar polo seu propio país.

Cada país require 3 obxectos. É preciso ter eses obxectos e mais un pasaporte para poder viaxar a el. A túa man representa a túa mochila: mételle o que vaias necesitar!

Para obter estes obxectos apaña, recicla, troca ou rouba doutros xogadores.

Tipos básicos de cartas

PAÍSES (x13)

OBXECTOS (x32)

PASAPORTES (x12)

Preparación do xogo

1. Pasaportes
Cada xogador colle un pasaporte para a man. Aparta os pasaportes sobrantes.

2. Países
Pon 1 país ao chou na mesa diante de cada xogador.
Pon 1 país ao chou no centro da mesa.
Aparta os países sobrantes.

3. Monte e man inicial
Baralla todas as cartas de obxecto para formares o monte.
Cada xogador apaña tres cartas do monte.

4. Expansións
Baralla no monte as expansións coas que queirades xogar e/ou reparte as personaxes.
(Recomendámosvos que xoguedes a vosa primeira partida sen ningunha expansión).

EXEMPLO DE PREPARACIÓN PARA 3 XOGADORES:

COMEZO
Empeza o xogador cuxa carta de país estea máis perto do que hai no centro na vida real.
A partida continúa no sentido das agullas do reloxo.

Accións

No teu turno, podes levar a cabo unha das seguintes accións:

1. APAÑAR
Colle 1 carta do monte.

2. RECICLAR
Custo: descarta 2 cartas da túa man.
Elixe e colle 1 carta dos descartes.

3. TROCAR
Troca 1 ou máis cartas con 1 outro xogador. Cara arriba!
Bonificación: Apaña 1 carta se completas un troco estando no teu turno.

4. ROUBAR
Custo: descarta 1 carta da túa man.
Colle 1 carta ao chou da man doutro xogador.

5. VIAXAR
(Consulta a sección "Viaxar" máis adiante)

O teu turno remata en canto terminares a acción.

Outras regras

Límite de cartas na man
Podes ter un máximo de 7 cartas na man (incluíndo pasaportes e obxectos especiais).
Se nalgún momento tiveres máis de 7 cartas, descarta ata ficares con 7.

Man baleira
Se no comezo do teu turno tiveres a man baleira, apaña 3 cartas. Isto non conta como acción.

Monte baleiro
Unha vez se colla a derradeira carta do monte, baralla de novo os descartes para formares un monte novo.

Viaxar

No teu turno, podes viaxar a un país se tiveres:

Todos os obxectos requeridos por ese país
Un pasaporte

Para viaxares:

Amosa toda a túa man aos outros xogadores.
Descarta os 3 obxectos usados para viaxar. Queda co pasaporte e mailo resto.
Aparta o país completado da área de xogo.
Apaña 1 carta do monte, de balde.

Se fores o primeiro en viaxar ao país do centro, parabéns! Gañaches a partida!

Expansións

Engade un ou máis dos seguintes tipos de cartas ao xogo para aumentardes a diversión!

EVENTOS (x4)

Tras o paso 3 da preparación, baralla no monte todos os eventos (Event).
Han de xogarse inmediatamente cando se collen.
Afectan a todos os xogadores.
Non se poden reciclar dende os descartes.

OBXECTOS ESPECIAIS (x9)

Tras o paso 3 da preparación, baralla no monte todos os obxectos especiais (Special).
Usa estes obxectos tal e como se explica na carta.
Algúns dos obxectos especiais gastan unha das túas accións. Outros poden xogarse en calquera momento. A propia carta explícao.

OBXECTOS PROHIBIDOS (x3)

Tras o paso 3 da preparación, baralla no monte todos os obxectos prohibidos (Forbidden).
Un xogador non pode viaxar cun obxecto prohibido na man.
Para te librares dun obxecto prohibido, has de descartar 1 outra carta e así poñer as dúas nos descartes.
Iso conta como o teu turno.

POSTAIS (x6)

Tras o paso 3 da preparación, baralla no monte todas as postais (Postcard).
É outra forma de gañar!
Un xogador con 4 postais gaña de inmediato: non é unha acción nin cómpre esperar ao turno dese xogador.

PERSONAXES (x6)

Durante o paso 1 da preparación, pon 1 personaxe diante de cada xogador, cara arriba.

Aparta as personaxes sobrantes.
As personaxes non se poden trocar.

Preguntas habituais

Regras

Viaxar

Calquera pasaporte vale para viaxar. Se perdes o que tiñas, troca ou rouba outro.

Apañar

Podes apañar cando tes a man chea, pero has de descartar ata teres só 7 xusto despois.

Reciclar

Podes revisar os descartes para veres se hai algo que precisas ou queres.

Trocar

Podes mentir sobre o que tes na man, pero as cartas que se troquen han de ser as acordadas.
A cantidade de cartas dadas e recibidas nun troco non ten que ser a mesma. Por exemplo, pódense trocar 3 cartas por 2, sempre e cando ambos xogadores estean de acordo.
A acción de troco complétase só cando se entregan as cartas. Se fas unha oferta pero o outro xogador a rexeita, podes decidir levar a cabo outra acción.
Só apañas unha carta de bonificación se o troco se leva a cabo e só se estades no teu turno.

Obxectos prohibidos

Non podes descartar un obxecto prohibido para pagar polo custo das accións de reciclar ou roubar.
Se tes cartas de máis na man e has de descartar algunha, non podes descartar un obxecto prohibido.
Non podes descartar un obxecto prohibido para te descartares doutro obxecto prohibido.
Os obxectos prohibidos poden ser roubados.
Podes trocar un obxecto prohibido con outro xogador, se acepta o troco.

Obxectos especiais

Interromper a acción doutro xogador cun obxecto especial, como a Ratoeira (Mousetrap), fai rematar o seu turno.
A Tarxeta de crédito de Mamá (Mom's Credit Card) non pode facer de pasaporte nin postal.
Co Guía local (Local Guide) e o Posto comercial (Trading Post) só podes coller do monte (apañar), non dos descartes.

Personaxes

O Contrabandista (Smuggler) só pode entregar obxectos prohibidos desde a súa man.

Varios

Postais

Estás a xogar con alguén especial? Pídelle que che escriba algo nunha das postais! Servirá de lembranza dos bos momentos pasados xuntos.

Números e paus de póker

Os obxectos normais, especiais e prohibidos, así coma os eventos e as postais, teñen os paus e números da baralla francesa no recanto de abaixo á dereita. Deste xeito aforras levar outra baralla máis cando viaxas! Dálles a volta ás cartas e xoga ao póker ou ao que ti queiras.

Galician rulebook translation by Xurxo Diz Pico. Thank you!!